Fyrsta upphitun...

Tékkið á þessu mínir kæru lesendur...

http://www.youtube.com/watch?v=Hawg5Gs9Tp0

eg

FússBall GeSehen

Jæja Góðan Dag þá.

Sit hér í sófa Drekahellis, nýbúinn að sjá Chelsea taka United 1-0 á glænýjum og glæstum Wembley.  Ekki annað að sjá en að strákarnir hafi verið að gera fína hluti með hamarinn að því er virðist.  One vonar svo bara að spá mín héðan af blogginu, 29.4 sl. rætist hvað varðar skiptingu titla á tímabilinu...

Aþena nálgast óðfluga og skellur á mann nk. miðvikudag.  Milan verður þar í ógurlegum hefndarhug og ætla sér að reyna að plástra aðeins ofan í svöðusárið mikla sem myndaðist 2005.  Þar átti sér stað stærsta og flottasta endurkoma liðs í einum fótboltaleik fyrr og síðar.  Þetta verður ekki leikið eftir, allavega ekki í úrslitaleik Meistaradeildar.  0-3 eftir 52 mínútur... 3-3 6 mínútum síðar... Ótrúlegt helvíti.

kveð að sinni,

eg

 

Kosningakvöldið

Sæl.

Kosningarnar að baki og fólk getur farið að anda léttar aftur.  Hjóluðum á kjörstað og kusum hárrétt að þessu sinni, bæði tvö að ég held.  Óvernju erfitt reyndar þetta krossapróf, yfirleitt ekki svona margir valmöguleikar.  Héldum svo áfram sem leið lá niður á Laugaveg.  Verslaði þar takkaskó, legghlífar, Irish Coffee og svefnsófa handa Múfú...  Merkilegar sumar ákvarðanir sem maður tekur í þessu lífi.  Hittum Risessuna og föðurinn ógurlega einnig og voru þau feðgin að gera fína hluti.

Fór svo sjálfur til Benna og frú um kvöldið í Euro/kosningavöku pizzuveislu að hætti Irps.  Verð að hæla Irpsinu fyrir frábæra veislu.  Borðaði svo mikið að óeðlilega lítið pláss var fyrir bjórinn þetta kvöldið.  Ofan í þetta var snakk, lakkrís og súkkulaði hámað í sig með slíkum látum að lifrin, nýrun, skeifugörnin og smáþarmar tóku sér frí í dag vegna harðsperra.

Æfingaleikur í dag með Stormi á móti Henson á Framvellinum.  Nýju skórnir fínir en svolítið litlir ennþá.  Fínt að hafa náð einum leik í lappirnar.

En jæja, kveð að sinni um leið og ég bið Samúel Örn vin minn að örvænta eigi.  Enn er verið að telja atkvæði frá Hornbjargsvita, Papey og Hveravöllum, berast í hús í nótt svo ég bið Samma að bíða rólegur við símann...

eg

Síðasta Útilokunin

Góðan dag.

Einn flokkur eftir, ein útilokun.  Sjálfstæðisflokkurinn er það heillin og ekki fær hann frekar en hinir minn kross, mína sál.  Pirrandi háir stýrivextir, sem fræðimenn segja slæmt og ekki ljúga þeir.  Verðbólga í hærri kantinum.  Aldraðir og öryrkjar ekki að njóta réttrar meðferðar.  Þeir lægst launuðu of hátt skattaðir og furðulegt eftirlaunafrumvarp í gangi.  Fleiri mál mætti telja upp og eins mætti telja upp fullt af öðrum málum sem vel hefur verið staðið að.  Sjálfstæðisflokkurinn hefur heldur aldrei í þessari baráttu haldið fram að allt væri hér í stakasta lagi.  Það er þó gott að þetta fólk sjái það þó og gera vonandi e-ð í málunum ef þeir halda áfram að stjórna landinu.  Sjáum hvað setur í þessu...

En, sem sagt kjördagur runninn upp og ætlum við hjónin að hjóla nakin á kjörstað á næstu mínútum.  Kjósum í Laugardalshöll fyrir áhugasaman lýðinn.

eg

Kross2007

Sælinú.

Spurning hvort Ingibjörg Sólrún sjálf kommenti á þennan pistil á eftir.  Er nefnilega í þann mund að fara að útiloka Samfylkinguna fyrir kjördaginn mikla á morgun.  Finnst Ingibjörg reyndar hafa komið mjög vel út síðustu daga og staðið sig með miklum sóma.  Rauða draktin reyndar ekki að gera mikið fyrir mig en aldrei hægt að gera öllum til hæfis í klæðavali.  Fellur alltaf í jafn grýtta fjöru þegar ég mæti í hlébarða leðurdressinu mínu í vinnuna...  En þarna er gott fólk á ferðinni sem vill vel.  Saknaði þess þó að enginn gaf mér nammi á meðan kosningabaráttunni stóð, en maður fær kannski e-ð á morgun.  Spurning að dreifa sér um kosningaskrifstofurnar og þiggja hinar ýmsu veitingar á morgun.  En mér finnst Samfylking hafa einblínt einum of, og þá sérstaklega framan af, á það að vera á móti því sem stjórnarflokkarnir sögðu og gerðu.  Og voru svo spurð hvað og hvernig þau vildu gera hlutina í staðinn og þá varð fátt um svör.  Hafa t.d. ekki hugmynd hvað þeirra loforð komi til með að kosta landsmenn, en gagnrýna þvílíkt hvað t.d. samgöngufrumvarp Sjálfstæðismanna kostar.  Ástæða mín fyrir höfnun er þó aðallega sú að Hombre ætlar sér hugsanlega að kjósa flokkinn.  Tel það gruggugt og legg það ekki í vana minn að fiska í svoleiðis tjörnum...

Hlakka til að lesa komment Ingibjargar eða kannski Marðar...

eg

x-2007

Úgg Úgg...

Útiloka hér með Frjálslynda flokkinn.  Helst til of róttækur í sínum málflutningi og þykir enn... Með vísan í hvaða dægurlag er þessi setning??  En, jæja, þeir hafa sem sagt ekki alveg náð til mín.  Finnst þeir einum of einhæfir í sinni baráttu þar sem einblínt er á stöðvun innflutnings útlendinga og úrbætur á kvótakerfinu.  Einnig mjög svo óraunhæft og helst til dýrt kosningaloforð í 150 þúsund króna skattleysimörkum.  Myndi kosta ca 60 milljarða sú hækkun...

eg

Svona Bloggar Maður Um Frétt Af Mbl.Is...

Grmbl...

Munnmök ein ástæða krabbameins í hálsi

Nýtt Blogg

Halló.

VÍS dagurinn á laugardaginn var.  Snilldardæmi þar sem fólk gerði sér glaðan dag frá því kl. 13 og langt fram á nótt.  Fór þetta fram á mínum gamla heimavelli inní Smára.  Innri skoðun var þemað framan af degi, þar sem kaffihúsastemming var sköpuð og fólk að lýsa eigin starfi fyrir samstarfsfélögum.  Svo var liðinu, ca 200 manns, skipt uppí 4 svið og hin ýmsu skemmtiatriði æfð sem síðar yrðu sýnd fyrir hina.  Gríðarleg stemming í salnum þegar atriðin voru flutt og fagnaðarlátunum ætlaði hreinlega aldrei að linna.  Skemmst frá því að segja að minn hópur fékk það verkefni að vera með danssýningu...  Tangó var það heillin þar sem tvö og tvö dönsuðu saman.  Kalt mat af minni hálfu þetta; ég var langbestur og aðrir aðeins síðri... 

Indverskur matur og barinn opinn.  Allavega fyrir flesta...  Komst að því að ég er að vinna með ágætis fólki sem vel er hægt að röfla í.  Hélt svo heim í kringum miðnættið, gríðarlega sáttur við daginn.

Vil enda þennan pistil á að setja inn mynd þar sem það var eina ástæðan fyrir þessu bloggsíðuskiptingarbrölti mínu að það er miklu auðveldara að skella inn mynd í bloggfærslum þessarar síðu.  Vantaði sárlega þann fítus þegar ég var að bulla um alla vitleysingana sem urðu á leið minni á íþróttaferlinum.

Finnst við hæfi að skella inn mynd af Flemming Oliver Jensen, einum alklikkaðasta þjálfara sem ég hef kynnst.  Þjálfaði mig í Ajax/Farum.  Það sést vel á mynd hversu klikkaður maðurinn er...

eg

 

 

Champions League

Góðan daginn.

Massívar undanúrslitaviðureignir að baki í Meistaradeildinni.  Þar má segja að hefðin hafi haft betur gegn mögulega betri liðum.  Samtals eiga Liverpool og AC 11 (5 hjá LFC og 6 hjá AC) evróputitla meistaraliða á móti 2 hjá ManU og Chelsea.  Enn eitt magnað evrópukvöld á Anfield varð að veruleika þegar Rauði Herinn sló milljarðalið Chelsea út.  Sanngjarn sigur í þeim leik þar sem Liverpool var betri aðilinn, öskraður og sunginn áfram af mögnuðum stuðningsmönnum liðsins.  Minnisstæð rimma sem fór alla leið í vítaspyrnukeppni þar sem mínir menn höfðu mun sterkari taugar og kláruðu dæmið.  Niðurstaðan því ljós, 2. úrslitaleikur liðsins á þremur árum staðreynd.  Ágætis árangur hjá ekki stærra liði...

Mótherjinn í Aþenu 23. maí, líkt og fyrir 2 árum verður AC Milan.  Slógu United út á mjög sannfærandi hátt með 3-0 bursti í seinni leik liðanna á San Siro.  Ekki kannski óskamótherjinn miðað við spilamennsku þeirra í fyrri hálfleik á móti ManU.  Í úrslitaleik getur reyndar allt gerst en ljóst er að Milan hyggur á hefndir, blóðhefndir...  Sjálfsagt vakna Maldini og co enn upp á nóttunni í svitabaði vegna martraða um Istanbul ævintýrið ógurlega.

Kveð að sinni.

eg

Útilokunaraðferðin

Góða kvöldið.

Sit hér heima með hund á lærum og tölvu á sófa að hripa þessi orð niður.  Merkilegar þessar tölvur, maður ýtir á fullt af tökkum og stafir birtast á upplýstum skjá!  Heillandi apparat.

En eins og áður hefur komið fram, þá er maður að myndast við það að mynda sér skoðun á því hvaða vitleysinga maður á að kjósa í kosningunum 12. maí nk.  Maður hefur nefnilega heyrt að maður eigi að nýta kosningarétt sinn, það sé jú hornsteinninn í öllum lýðræðissamfélögum eins og við búum í.  Hvað ætli myndi gerast ef enginn kysi??  Allir myndu hugsa eins; ja eitt atkvæði skiptir akkúrat engu "god damn fucking" andskotans máli!  Spurning hvort tölur síðustu skoðanakönnunar yrði látin gilda.  Eða bara úrslit síðustu Alþingiskosninga.  En ég held því fram, "at the end of the day"  þá skiptir það litlu sem engu máli hverjir sitja í stjórn og hverjir í andstöðu. 

Ég hika ekki við að beita útilokunaraðferðinni áfram.  Hef nú þegar strikað yfir VG og Íslandshreyfinguna.  Strika hér með yfir Framsókn og ástæðan er einföld.  Kom við í Glæsibæ um daginn á leið heim úr vinnu.  Var að sækja björgina í búið.  Brauðhleif og fleiri nauðsynjar eins og gengur.  Gekk þá í flasið á frambjóðendum Framsóknar, þar sem þau voru að dreifa Opalpakka og bæklingi um sjálft sig.  Skemmst frá því að segja að opalið fór illa í magann á undirrituðum og mikill viðrekstur herjaði á heimilið þetta kvöld.  Fnykinn lagði yfir borgina og bárust fréttir reglulega inn vegna þessa.  Maður á Kjalarnesi þungt haldinn... Kona á Álftanesi þjáist af lungnasamþjöppun sökum óþefjan og páfagaukur í næsta húsi lést í rólunni sinni...  Því ljóst að þetta fólk kýs elvar ekki.  Ljót og mjög þung reynsla.

eg